म्यानचेस्टरद्वारा रियाल पराजित

सिजनपूर्वको अभ्यासको कुनै महत्व नभएको बताउँदै आएका युनाइटेडका प्रशिक्षक जोजे माउरिन्होले रियालविरुद्धको जितपछि पनि सोही कुरा दोहोर्याए। ‘मैले सिजनपूर्वका अभ्यास भ्रमणबाट केही सिकिनँ,’ युनाइटेडका प्रशिक्षक माउरिन्होले भने, ‘मलाई सान्चेज, हरेरा र हुवाँ माटाको क्षमता थाहा छ । उनीहरू आफूलाई प्रमाणित गर्न चाहन्छन् र मिहिनेत पनि गरिरहेका छन् । हामीले सुखद नतिजाका लागि खेल्यौं तर रणनीतिक रूपमा यो जितको कुनेै अर्थ छैन।’ १८औं मिनेटमा सान्चेजको माटियो डार्मियानको पासमा गरेको गोलमा युनाइटेडले अग्रता लिएको थियो । त्यसको ९ मिनेटपछि हरेराले गोल गर्दै युनाइटेडको अग्रता दोब्बर पारेका थिए । ४५आैं मिनेटमा बेन्जेमाले गोल गर्दै रियाललाई खेलमा फर्काउने प्रयास गरेका थिए । बेन्जेमाले थियो हर्नान्डेजको पासलाई पोस्टको दिशा दिएका थिए । ‘मलाई केही थहा छैन,’ युनाइटेड टोलीमा एन्थोनी मार्सियालको लगातारको अनुपस्थितिका बारेमा सोधिएको प्रश्नमा माउरिन्होले भने । यता पहिलो हाफको तुलनामा दोस्रो हाफमा सुधारिएको प्रदर्शन गरे पनि पाएका अवसर सुदुपयोग गर्न नसक्दा सिजनपूर्वको पहिलो अभ्यास खेलमा जित हात पार्ने रियालका नयाँ प्रशिक्षक युलियन लोप्तेगीको लक्ष्यले पूर्णता पाउन सकेन। रूस विश्वकप सुरु हुनु एक दिनअघि आफूहरूको जानकारीबिना रियालको प्रशिक्षक बन्ने सम्झौता गरेको भन्दै स्पेनिस फुटलब संघले लोप्तेगीलाई बर्खास्त गरेको थियो । रियालविरुद्धको खेलसँगै स्पेनिस गोलकिपर डेभिड डी हिया टोलीमा फर्कंदा यसै सिजन ओल्ड ट्राफोर्ट भित्रिएका ब्राजिली खेलाडी फ्रेडले युनाइटेडबाट डेब्यु गरे । त्यस्तै रियालले पनि यसै सिजन क्लबमा भित्रिएका १८ वर्षे स्ट्राइकर भिनिसियोस जुनियरलाई डेब्यु गराएको थियो।

 

 

सम्बन्धित शीर्षकहरु